आता पुढे बाळचरित्र ।Ata Pudhe Baal Charitra

आतां पुढें बाळचरित्र । कृष्णक्रीडा अति विचित्र ।
ऐकतां श्रवणीं होती पवित्र । गातां वक्र शुचिर्भूत ॥१॥
एक अजर एक अक्षर हे भगवत्कथा । श्रवणीं पडतांचि अवचिता ।
कैवल्यपदप्रप्तीची योग्यता । पावे श्रोता वक्ता तात्काळ ॥२॥
श्रीकृष्णाची बाललीळा । अद्‌भुत सुखाचा सोहळा ।
वेधुनियां नरनारी बाळा । गाई आणि गोवळा ब्रह्मप्राप्ती ॥३॥
ब्रह्मादिक दर्शना येती । सकळही देव आणि सुरपती ।
गगनीं विमानें दाटती । सुमनें वरुषति सुरवर ॥४॥
श्रीकृष्णाचें नामकरण । विधिविधानें द्विजभोजन ।
नंदयशोदे उल्हास पूर्ण । सुवासिनी ब्राह्मण सर्व जना ॥५॥
मंगळघोषाचिया गजरीं । निशाणें दुमदुमलिया भेरीं ।
टाळ मृदंग झणत्कारी । नाचतीं वैष्णव पदें गाती ॥६॥
निळा म्हणे नगरवासी । प्रांतवासी देशवासी ।
आले द्विपांतरनिवासी । कृष्ण सोहळा पहावया ॥७॥