ऐशी अगाध चरित्रे याची । Aishi agadh charitre yanchi

ऐशीं अगाध चरित्रें याचीं । वर्णितां भागला शेष विरंची ।
लोक म्हणती हा सर्प बिलेंचि । कैसेनि पां वांचला ॥१॥
मग त्यां सांगे नारायण । यासी नेलें वर्ष होऊन ।
गोवळ वत्सें ब्रह्मसदन । पावोनि होते बैसले ॥२॥
कालिचि ते आले येथें । म्हणोनि सांगती नुतन वार्ते ।
द्विगुणपणें हे कैसेनि तुमतें । प्राप्त झाले कां नेणां ॥३॥
ऐसें सांगतां श्रीहरी । अवघ्यां जाणवलें अंतरीं ।
परम लाघविया मुरारी । खेळ खेळे विचित्र ॥४॥
अघासुरा वधिल्यावरी । पुढें धेनुका बोहरी ।
कैसी केली याची परी । तेहि सुजाण परिसतु ॥५॥
एकैक याचें कथनक । श्रवण भवबंधा मोचक ।
म्हणोनियां सात्त्विक लोक । हेंचि ऐकती अनुदिनीं ॥६॥
निळा म्हणे हे बाळक्रीडा । परी परमार्थ साधनाचा हुंडा ।
श्रवण मनन होतांचि फुडा । ब्रह्मसाक्षात्कार पाविजे ॥७॥